Volledig scherm
© Thinkstock

Zevene, da’s nii m’n geluksgetal

AUDIO / STREEKTAALWat binne hie noe an ‘t doen?’ vraogt de buurman die zô noe en dan van over de straote even binnen wipt. Zô maor even om een praotje te maoken. Dan doen me nog a makkelijk, ook over en ‘t weer. 

’t Was ‘n paor weken geleejen. Net nao Nieuwjaor. Dan lôôp je makkelijk even binnen en wudder ‘aon al lange in de buurte tegen mekaore gezeid, dat me toch wel ‘s wat mêêr zouden meugen buurten. Zô maor even voor een praotje. In de zeumer in d’n ‘of. Maor in de winter is dat wat anders. Mee al die nattigheid van de leste weken, kom je daor niet in.

,,Je bin de leste daogen ook nie in j’n uus gewist”, begint ie, want “gisteren was ‘k nog an je deure, mao die was op slot.” Ik knikken en vertel ‘em, dan ‘k ‘n dagje nao Bredao was. Jao, mee den trein, want mee de bus over ‘Ulst is dat toch ‘n ‘êêle toer. 

,,Kiek, da’s raor ee”, begin ik en ik wiezen op een klein koekoeksklokje dat al jaoren op mijn kaomer boven ‘angt. En noe op taofel ligt. ,,Dat klokje lôôpt primao, mao ‘t slaot ieder uure zeven kêêr. Snappe hie da. Die is van slag. Altied mao zevene?”

Nêê, van klokken ‘ao tie glad gêên verstand, mao die maokende toch kleransie om ‘s in ‘t binnenste te kieken. ‘n Kêêr draoien, ‘n kêêr schudden. Mao mee spullen van ‘n ander, dao gao toch wat anderser mee om, dan van j’n eigen. ‘n Schroevedraoiertje gepak, ‘n ‘aokepinne. Nog ‘s omkêêren. ,,Messchiens moe je ‘s ‘n andertje kôôpen op de rommelmarkt”, zegt ie berustend en legt alles op taofel terug. 

Noe moen ‘k zeggen, daor ‘aon ook al ‘s angedocht. Een ander koekoeksklokje kôôpen op de rommelmarkt. In Middeburg bievoorbeeld. Dao kocht ik ‘n jaor of tiene geleejen ‘s een schôône pedule zonder sleutel. Mao die liep gegarandeerd goed, zei de kôôpman. Allêêne gêên sleutel ee. Ik kôôp die pedule en in de Lange Delft kocht ik ‘n sleutel. En jao ‘ôôr die liep als een trein en die doet ‘t noe nog goed.

Mao mee dit koekoeksklokje is dat toch ‘n ander gezang. Die is ‘êêl gevoelig voo schêêf ‘angen. Ik bedoel mao, as je de gewichten optrekt, dan gaot dat klokje dikkels ook ‘n beetje scheef. En dan lôôpt ie mao even. Noe docht ik dao wat op gevonnen te ‘èn. Een streepje zetten op ‘t behang. Mao dat kloppende toch ook nie altied en noe staon d’r al een streepje of tiene in verschillende kleuren in de buurte van dat klokje. 

En weete hie noe wat ‘t goeje is? Ikke nie. Wegdoen? Bel nêên. As kind kwam ik vroeger bie familie, en vol bewoonderieng bleef ‘k kieken nao udder koekoeksklokje en vooral nao dat deurtje dat openen en dichte vloog. En ielke kêêr as ‘t open schoot, stak dien brutaole koekoek z’n kop nao buuten en begon te roepen. En vanaf dat moment val ‘k op zukke klokken. ,,Den dezen ‘èn gekregen van ‘n kennis”, zeg ‘k nog tegen de buurman, ,,en toen sloeg tie nog priemao.” En misnoegd ruum ‘k alles van de taofel op en schuuf ‘t spulletje in ‘n schoenendôôze. 

Morgen wee vèder. Jao, zô komme kik de winter deur. Zevene, da’s nii m’n geluksgetal. Most ik nie altied om zeven uur nao bed als klein kind?

PZC gebruikt je persoonsgegevens om deze reactie te kunnen plaatsen. Meer informatie vind je in ons privacy statement
  1. De scholen waere wi behonne
    PREMIUM
    streektaal | audio

    De scholen waere wi behonne

    Langzaemerand ore de spandoeken mee de tekst: 'De scholen bin wi behonne' opgeruumd. Me bin lang genoeg geweze op het feit dâ wi vee huus iedere dag op pad en baene bin nae de zeumervakantie. Ons bin wi gewend gerocht an de groepen huus op de fiets die, vanuut ulder durp, nè 'stad hae. En de huus raeke gewend an met naeme de overgang van de kleine durpsschole, wi ze te voet nè toe hienge, nè de 'schoolfabrieken' wi onderde andere, voral ouwere, in het begin vee ontzag ingeboezemd ebbe.
  2. Over biegelôôf gesproken
    PREMIUM
    STREEKTAAL I Audio

    Over biegelôôf gesproken

    September is altied 'n schôône maond. Overdag is 't soms lekker weertje en dat doe dienken an de zeumer. As 't zonnetje schiint, dan kan 't best lekker ziin. Vooral as dat zonnetje op de rik schiint. Mao avonds is dat wat anders. Nao 't eten is 't gedaon mee dat lekker zonnetje. Toch? Dan wordt 't al vlug koel. ,,Je kan mèrken dan me nao de baomesse gaon'', zeien dan vroeger d'ouwe mènsen. En 't is zô. 't Is ommerst a vroeg doenker. Om 'n uur of negene gaot 't licht al an.
  3. Gelek en geflèr
    PREMIUM
    Streektaal/audio

    Gelek en geflèr

    Een paer weken elee stoeng Trump in de krante twint a t'n de voorzitter van de EG kust'n. Goed voe een foto mae of a ze het meênden dat za nog motte blieke. Mekaore een stevigen and geve ao ok a moai ewist. Oans bin nie zo gewend om mekaore te kussen, zeker as vent gin venters. Bie vrouwen is het a een gedoe, wan het is nie eên kus, mae aoltied drieë. M'n vaoder ao d'r ok a een ekel an. Dat gelek en dat geflèr, daè most 'n niks van è. Een and geve liekt beter, mae daè kunne letterlijk en figuurlijk ok bezwaeren an kleve. Laèt m'es kieke welke.
  4. 'K Gaon an de slag
    PREMIUM
    Streektaal

    'K Gaon an de slag

    Die ei 't overleefd. Dat 'aon nie gedocht. Bie die drôôgte stoeng tie d'r anders belabberd bie. Dat moen 'k wel zeggen. Ik knikken maor 's. 't Is de buurman die altied a vroeg verbie komt. Ook gisteren, toen 'k m'n groene bak an 't vullen was. 'k Was voorzichtig begonnen an de naojaorsbeurte. Zô 'ier en daor de takjes wat afknippen. Da kan noe natuurlijk al. De mêêste groei is toch uut de struken. En van de zeumer most je dao glad nie an beginnen.