Volledig scherm
Henk Blom © DirkJan Gjeltema

Streektaal: De zonne maekt 't aomè nog moôier

Audio'T naejaer is tot nog toe eêl moôi in mien durpje. 't Ei nie vee gesturmd, dust de boamen stae nog in 't blad dat bruun, geel in roôd gekleurd is. De zonne maekt 't aomè nog moôier. Jao, die schient ier an de kust toch wè dikkels, dae bin ons bekend om.

De vrouwe in ikke gae zô vee mohelijk 'n stuitje loape, want ze zaahe dat 't vô ouwe botten zô goed is. In dan kû m'n glieke zie wat of t'r aomè wî an 't veranderen is. Dat gae naemelijk bie ons in aalk naejaer eêl ard. Ik wone noe bienae 63 jaer op Renisse in ik è 't flienk zie verandere. D'r bin maansen, die dat aarg jammer vinde, want jao, 't is nie mî dat stille durp waer of ze vroeher zô graeg op vekansie kwaeme. Noe, z'è wè gliek vô wat de drukte anhaet. Wulder è jaeren lank midden in de nacht wakker elehe dû de jeugd die schreêuwend of ziengend nae drieë richtieng campieng gieng. Want om drie ure moste de disco's slute. Mâ varder zie ik toch vee voôrdeêlen. Ik kieke enkelt nog mâ naer aole wienkels in restaurants die m'n ekrehen è. D'r komme zôvee toeristen, de ondernemers motte daer op insprienge in zôdoende gae ze noe verbouwe. Ok de gemeênte Schouwen-Duveland is â 'n paer weken overâ tehelieke bezig mit waark wat of ze motte doe as t'r weinig toeristen bin. Mâ dat is nog best moelijk, want tehenwoordig is 't ier 't eêle jaer nog â druk. As de Nederlanders gin vekansie viere bin d'r wè Duitsers in as die d'r even nie bin komme de Belhen. Die è de Schouwse kust ok ondekt. Vee moôier as bie ulder. Gister was 't vô ons nie maklijk om te loapen, zôvee straeten waere op'ebroke. M'n è as acrobaten onze wandelieng of'emaekt. Gelokkig è'k d'r vandaehe niks van emorke, gin spierpiene. Mâ ik klaehe nie, want de gemeênte ei vee edae om 't durp moôier te maeken in as aoles klaer is è ze zô'n twaolf miljoen euro enkelt daeran besteed. De leste jaeren bin ok de meêste zupende joengeren naer Belhië of Spanje ehae, dust van die terreur bin ons of. Mâ net noe ons ophelucht aesem aele kriehe m'n aneêns de terreur van bepaelde volwassenen. Dat bin naemelijk de motorriejers. Die è de gewoonte om ulder 'liefste' speelhoed mit vee geknetter te starten in mit ieselijks vee leven weg te riejen. Je schrik j'n eihe wezeloôs as je daer vlakbie loapt. Dan doe je wat goeds vô je botten in dan krieg je 't an j'n arte! Dâ's toch ok wî nie zô best vô de maansen die in 't naejaer van ulder leven bin. Me zû 's kieke wat of ons daer an kunne doe. Wulder è 'n eêl goeie durpsraed, die mot dae mâ 's over dienke. Ik è dae gin tied vô, ik mot bedienke waer of mien volhende stikje in 't Schouws over zâ gae.

PZC gebruikt je persoonsgegevens om deze reactie te kunnen plaatsen. Meer informatie vind je in ons privacy statement
  1. De scholen waere wi behonne
    PREMIUM
    streektaal | audio

    De scholen waere wi behonne

    Langzaemerand ore de spandoeken mee de tekst: 'De scholen bin wi behonne' opgeruumd. Me bin lang genoeg geweze op het feit dâ wi vee huus iedere dag op pad en baene bin nae de zeumervakantie. Ons bin wi gewend gerocht an de groepen huus op de fiets die, vanuut ulder durp, nè 'stad hae. En de huus raeke gewend an met naeme de overgang van de kleine durpsschole, wi ze te voet nè toe hienge, nè de 'schoolfabrieken' wi onderde andere, voral ouwere, in het begin vee ontzag ingeboezemd ebbe.
  2. Over biegelôôf gesproken
    PREMIUM
    STREEKTAAL I Audio

    Over biegelôôf gesproken

    September is altied 'n schôône maond. Overdag is 't soms lekker weertje en dat doe dienken an de zeumer. As 't zonnetje schiint, dan kan 't best lekker ziin. Vooral as dat zonnetje op de rik schiint. Mao avonds is dat wat anders. Nao 't eten is 't gedaon mee dat lekker zonnetje. Toch? Dan wordt 't al vlug koel. ,,Je kan mèrken dan me nao de baomesse gaon'', zeien dan vroeger d'ouwe mènsen. En 't is zô. 't Is ommerst a vroeg doenker. Om 'n uur of negene gaot 't licht al an.
  3. Gelek en geflèr
    PREMIUM
    Streektaal/audio

    Gelek en geflèr

    Een paer weken elee stoeng Trump in de krante twint a t'n de voorzitter van de EG kust'n. Goed voe een foto mae of a ze het meênden dat za nog motte blieke. Mekaore een stevigen and geve ao ok a moai ewist. Oans bin nie zo gewend om mekaore te kussen, zeker as vent gin venters. Bie vrouwen is het a een gedoe, wan het is nie eên kus, mae aoltied drieë. M'n vaoder ao d'r ok a een ekel an. Dat gelek en dat geflèr, daè most 'n niks van è. Een and geve liekt beter, mae daè kunne letterlijk en figuurlijk ok bezwaeren an kleve. Laèt m'es kieke welke.