Volledig scherm
Koolmees © Pixabay

De veugeltjes 'iengen op udder kop an die blomme

streektaal't Is vandaoge net 'n weeke geleejen dan 'k bezig was mee m'n zonneblomme. Noe za je zeggen, Rinus, moe je dao noe nog over schrieven. Over een weeke geleejen. Da's dan toch ouw nieuws joengen. Mao gao je gank, 't mag voo deze kêêr.

'k Was bezig den 'of nog wat de kant te doen, toen de buurman weer verbie kwam. Bie de drôôgpaole daor stoengen nog drie zonneblommen. Alli, zonneblommen? 't Mag gêên naome 'èn. Want allêêne de stammen die stoengen d'r nog. De blaoren waoren d'r bienao af en wat er nog an 'ieng te fladderen, dat waoren stikken lêlijke bruune diengen. En de pitten waoren d'r ook al 'alf uutgepikt deu de kôôlmeesjes. Da was trouwens schôône gewist. Die waoren dao weken opaf gevlogen. Zô van m'n troenke, roef, nao die koppen van die drie zonneblommen. En omdat die koppen mee de pitten omloage 'iengen, 'iengen die veugeltjes ook op udder kop an die blomme. 

Blomme, zeg ik, nêê die waoren ook al 'êlemao verslonst. 

Nêê, dan van de zeumer. Dan was 't schôône. Dan stoengen ze dao mee z'n drieën te proenken in m'n 'of. 't Was 'n lust om nao te kieken. Toen ze opkwaomen, waoren ze lange tied geliek van 'ôôgte, mao de middelste begon na ruum 'n beter flienk deu te schieten. Noe 'èn ik an alle drieje een kaorte met een letter gedaon: Ao, Bee en Cee. En ielke weeke nam ik de groei op. Noe za je zeggen, da's ook kinderlijk. Jao, mao toch ee. Meeten is weten. En de middelste kwam toet 2.37 m Die andere nog nie an twi meter. Raor ee? Ze staon meschien tien centimer van mekaore en toch zôvee verschil. En de langsten die ao ook de grôôtste blomme en dao vielen eigenlijk die mezen op. En toen kwaomen de katten van de buuren. Die stoengen uren onder die blomme, te wachten op een veugel, die mao nie wou vallen. Uren stoengen ze dao. 'Oe kan da noe,' dochten ze. 'Judder 'angen op judder kop en vallen nie nao beneejen?' Dao was zelfs al een padje deu m'n 'of van de straote nao die blommen gelôôpen. Noe weegt 'n katte toch eigenlijk nie veel, mao de grond is dudelijk angelôpen. 

'Gao je je blomme uutdoen?' vraogt de buurman die al 'n stuitje stoeng te kieken. Ik schudden van nee en zeggen dan 'k d'r een paor vetbollen mee zonneblompitten an gaon 'angen. Jao, zo'n netje. Die kreeg 'k voo m'n sinterklaois. 'Da's goed, de veugels weten de weg ee?' En daomee bedoelende die, dat van de zeumer de veugels om de pitten uut de blomme kwaomen en noe om 't vet en de pitten uut dat rooje netje. 

As 'k even laoter in m'n keukentje nao die drie blommen staot te kieken, kommen de d'êêste meesjes al angevlogen. Êêst in m'n troenke en dan roets, nao m'n zonneblommen. An ielke stam 'angt d'r netjes een zakje mee eten op udder te wachten. En noe 'angen die zakjes alle drieje op dezelfde 'ôôgte, mao toch zitten ze bots op de middelste. Is dat meschien omdat ze van de zeumer ook recht nao die zonneblomme vlogen? En de katten? Die staon wee op udder post, bie de troenke. Klaor om rechte nao de blomme te schieten. Jao, die ouwen 't padje wel wèrm. 

Dan gaot de tillefoon. De buurman, die achter de koffie is gegaon. 'Oe 'ôôge of die zonneblomme ook wee was geworren?' En voor alle dudelijk'eid zeg 'k d'r nog bie: 'De middelsten, de B van Bèrnaord, die eit 't het beste gedaon.'

PZC gebruikt je persoonsgegevens om deze reactie te kunnen plaatsen. Meer informatie vind je in ons privacy statement
  1. De scholen waere wi behonne
    PREMIUM
    streektaal | audio

    De scholen waere wi behonne

    Langzaemerand ore de spandoeken mee de tekst: 'De scholen bin wi behonne' opgeruumd. Me bin lang genoeg geweze op het feit dâ wi vee huus iedere dag op pad en baene bin nae de zeumervakantie. Ons bin wi gewend gerocht an de groepen huus op de fiets die, vanuut ulder durp, nè 'stad hae. En de huus raeke gewend an met naeme de overgang van de kleine durpsschole, wi ze te voet nè toe hienge, nè de 'schoolfabrieken' wi onderde andere, voral ouwere, in het begin vee ontzag ingeboezemd ebbe.
  2. Over biegelôôf gesproken
    PREMIUM
    STREEKTAAL I Audio

    Over biegelôôf gesproken

    September is altied 'n schôône maond. Overdag is 't soms lekker weertje en dat doe dienken an de zeumer. As 't zonnetje schiint, dan kan 't best lekker ziin. Vooral as dat zonnetje op de rik schiint. Mao avonds is dat wat anders. Nao 't eten is 't gedaon mee dat lekker zonnetje. Toch? Dan wordt 't al vlug koel. ,,Je kan mèrken dan me nao de baomesse gaon'', zeien dan vroeger d'ouwe mènsen. En 't is zô. 't Is ommerst a vroeg doenker. Om 'n uur of negene gaot 't licht al an.
  3. Gelek en geflèr
    PREMIUM
    Streektaal/audio

    Gelek en geflèr

    Een paer weken elee stoeng Trump in de krante twint a t'n de voorzitter van de EG kust'n. Goed voe een foto mae of a ze het meênden dat za nog motte blieke. Mekaore een stevigen and geve ao ok a moai ewist. Oans bin nie zo gewend om mekaore te kussen, zeker as vent gin venters. Bie vrouwen is het a een gedoe, wan het is nie eên kus, mae aoltied drieë. M'n vaoder ao d'r ok a een ekel an. Dat gelek en dat geflèr, daè most 'n niks van è. Een and geve liekt beter, mae daè kunne letterlijk en figuurlijk ok bezwaeren an kleve. Laèt m'es kieke welke.