Volledig scherm

Moôie maend

December è'k aoltied 'n leutihe maend gevonde. Op schole kô je de kinders vee laete maeke wat of mit sinterklaos in kossemisse te maeken eit. Netuurlijk kwam de sint mit pieten ok zaalf in dat was vô de kinders in vô de meêsters in juffen 'n spannende dag.

Pas nae dien dag kon ik gedichten gae maeke vô 't feêst bie ons tuus. Twint wier d'r op schole versierd vô kossemisse in kwam d'r van de gemeênte 'n boam in aalke klasse. Dat was de gelokkige tied dat de maansen nog nie zô moelijk deeje. Want sint dat 'r zô geklaegd 'oort over 't zwart wezen van de pieten bin ik toch aarg gae twufele of december nog wè zô leutig is.

Ik bin zaalf, dat mot ik wè bekenne, twî keer Zwarte Piet geweest. De eêste keer eêmae zwart, toe zat ik nog op de "kweekschool". De twidde keer op Renisse. De notaoris was eêl kunstzinnig in miek mien bruun. Dat was vee echter zeit'n in dat was ok zô. De kinders vonde 't aomè prachtig in ik dienke dat 't nog zô is. As ik de krante mot g'loave laete ze in Zeêland de pieten bienae overâ zwart. Dat is in aore previnsies wè andester. Zaalfs 't kabinet behint noe te twufelen, want de meêste ministers bin aoltied â benauwd geweest vô groôte schreêuwers.

Noe ik d'r over dûdienke is de zwarte piet eihenlijk d'n eênigsten die kleure bekent. 't Feêst oor bedurve dû de groôte maansen. Ze wieze op wat 'r aomè verkeerd edaen is dû de Nederlanders in 't verleden. Noe, dan bî m'n d'r nog nie! As wulder vinde dat m'n rekenienge motte ouwe mit 't slaovenverleden van Nederland motte m'n dat ok mâ doe mit 't verleden van de Kaarke, want daer oort de goeie sint bie. In dat verleden van de Kaarke is agheêl niks waer of m'n groôs op kunne weze. Oevee bin d'r daedû nie op de brandstaepel trechte gekomme?

Oevee oorlogen bin d'r nie gevoerd vô de Kaarke, christelijk of mohammedaons? Gae 's kieke in Ierland in vraeg naer de verstand'oudieng tussen Katholiek in Protestant? In wat of de leste paer jaer bekend g'oren is: oevee kinders bin d'r nie in internaten vô d'r leven bedurve? Dust as t'r noe eêne ofhevoerd zou motte 'ore is 't sinterklaos zaalf wè. Want die zâ as bisschop best geweten è wat 'r aomè mis was. Mâ dan bluuft'r nie vee over vô dit feêst. Zû m'n 't mâ ofschaffe?

Ik zou dat zaalf wè jammer vinde, want dan raek ik de marsepein kwiet in dae kâ je mien vô wakker maeke. Ofschaffe ei ok z'n voôdeêlen. Wulder bin dan verlost van de pepernoten die in september â in de wienkels laahe. De middenstanders oeve nie twî keer ulder zaeken op te tuuhen. Ze kunne glieke an 't aande van november, behin december d'r eihe richte op kossemisse. Dat gebeur trouwes noe toch ok â. 't Kerstkind bluuf onschuldig, die kan d'r niks an doe dat de Kaarke 't bedurven eit. In de kerstman mag wat mien anbelangt wè in Amerika bluve. Net as aol die rendieren, daer è m'n in Zeêland toch niks an. Ik dienke meer an 'n kerststal zonder os in ezel, mâ versierd mit mossels in oesters.

poll

Vakantiepark in het Veerse Meer moet kunnen

Vakantiepark in het Veerse Meer moet kunnen

  • Eens (49%)
  • Oneens (51%)
1246 stemmen