Volledig scherm

Gelek en geflèr (audio)

Z’n vrouwe wou zô graag meedoe an de kustmarathon. Mae Joop zei: “Ik bin nie gek or da ‘k daé voe ‘t ôôge van alf de waereld een bitje gàe stae kusse en dan zô lank.” ”’t Is lôpend”, zei z’n vrouwe, mae Joop was zô vol afschuw over ’t idee, at ’n dat ok nie oarden. “Joop, het is wandele, keure, nie kusse, te voet over ’t strand, de kusT.” Eindelijk was het toet z‘n deur’edronge, dat het om een lange afstandsmars gieng. Dat lucht’n op.

’t Was dan wè gin kussen, mae zô lange lôpe, twint a d’r auto’s en bussen rieë tussen Burgh en Zoutelande, dan gae je toch nie te voet. Da’s moeilijk doen. Z’n gedachten gienge toch wee vrom naè het kussen. Het liet um nie los. In de krante aod ’n een keêr eleze dat ‘r een record evestigd was van ‘omsterlangst kusse’. Die aod het uut’eknipt en in z’n schoenedoaze edae mie aollerande knipsels over vremde gebeurtenisssen liek as datums van de ondergang van de waereld (noait deur’egae overigens), de sterkste vent ter waereld (Don Reinhoudt* in de 70’er jaeren), de groatste sukerpee, de oudste mens en nog wat van die uutstuuksels. Daè zocht’n het kuskampioenschap op. Het lag nog taemelijk bovenan, wan het dateer’n van 2013. In Thailand was er een stel dat a ’t het meêr as 58 uren vol’ehouwen ao. En de regels wazze streng. Ze mochte in geên geval ulder luppen van mekaore doe, die moste op mekaore bluve. Joop kon dat nie begriepe. Oe mot dat dan bie ’t eten en drienken, wat a je naè achter mot. Die zag z’n eigen a op de wc zitte mie Jans op z’n bloate knieën en z’n luppen stieve op die van Jans. Zou ’t het wè waer weze? En drienke wellicht deur een rietje dat a dan naè binnen estoke wier in ’t oekje van je luppen. Ellèlle voe de wareld toch, een kus is toet ier an toe, mae dat zôlange vol’ouwe, was niks voe um. Daè bî je nie mie groat ‘ebrocht. Bie Jans thuus ok nie. Toen a ze jonk were en een bitje zate te flikflooien in uus dan zei d’r voader a gauw:”Opouwe mie dat gelèk en geflèr, dat doe je mae ergens anders.” Lichamelijk contact stoeng nie ôge an’eschreve. Dat was onfersoenlijk. Dat most je mae buten doe, mae ok nie aol te fel, wan dan liep je wee are gevaeren. Je was an’eweze op de zeêdiek of andere stille plekjes. En zelfs daè was je nie veilig. Op’eschote jongelui die a je kwaeme bespiede of de peliesie die a rondree om te kieken wat a je an het doen was, verstoorden de pogingen om an hoofdstuk tweê te begunnen naedat van een and en een kus. Dan raèk je nie bepaeld op’ewonde. ‘t Goeng over. En vrom thuus bleef het bie een kus achter ’t schuurtje. Trouwe en ‘t uus uut, dat was toendertied het beste. Pas dan mocht je tegaere de koffer in. Mae Jans docht in die tied nog da je van kusse ok zwanger kon raeke. D’r moeder ao ezeid: “Jans a je nattigheid voelt is ’t het te laete.” Dat was eêl d’r seksuele opvoeding ewist. Mie Jans naè Thailand ao d’r nie in’ezete.

Ze wiste noe beter en genote d’r van, mae liek as in films en in boeken eit het bie ulder noait ewist. Wellicht was dat ok aol mae schien. Die zet ’n de schoenedaoze vrom en gieng in uus.

Jans stoeng an d’n aanrecht, een prima vrouwe docht ‘n. Noait è me ruzie ehad. Liefde groei mie de jaeren ao schoanmoeder ezeid. Dat was een waer woord ebleke. Verknocht was het woord, ze were verknocht erocht an mekaore. In een opwelling gaf ’n ze een kus.

“Nou, nou”, zei Jans “dat gae nog a, è je wat van me noadig, Joopje?’ “Neênt”, zeid’n die, “zômae, gewoon een kus.” “Schel dan de petaoiten mae es voe me”, zei ze. “Da’s beter as dat gelèk en geflèr.”

*An m’n spierballen te zien, dienk ik a ’t het gin fermielje is.

poll

Ik hou van het Zeeuwse meisje

Ik hou van het Zeeuwse meisje

  • Eens (74%)
  • Oneens (26%)
219 stemmen