Volledig scherm

Noe rieje d’r echt gin boerewaehes mî dû ‘t durp

In 1955, kort nae de Ramp, bin ik op Renisse komme wone. ‘t Was nie echt stille op ‘t durp, mâ druk kô je ‘t toch nie noeme. Je zag nog boerewaehes op de rieng rieje, oahe op’elaeje mit ‘oôi. De groôtste persone-auto’s waere van boeren. Ik schreef teminsten naer mien ouwers dat ‘r boeren op klompen uutkwaeme, vô mien ‘n eêl nieuwe ervaerieng. Mâ varder zag je de maansen toch nie dikkels op klompen loape.

Wie dat wè deeje waere, gek genocht, gasten uut Olland, die ‘t leutig vonde om d’r op “z’n plattelands” uut te zien. Toe dat in 1965 de Greveliengendam klaer was wier ‘t trek andester. De maansen oefde nie mî mit ‘n boôt nae Schouwen te kommen, ze konde trek dûrieje nae de West’oek. In dat deeje ze dan ok, mit duzende. Dat trok netuurlijk ok projectontwikkelaers. Dat waere slimme joengers, die de kleinere boeren opzochte, want die aode meêstentieds slechte grond. Die konde ze verkoape in dae kô je dan moôi bungalowparken van maeke. Saeme mit de pensions, campiengs in aore bedrieven konde zô eêl vee maansen ier ulder vekansie dûbrienge in bruun ‘ore op de stranden van de West’oek. In aole biehebruunde maansen zurgde d’r vô dat op ‘t durp aolsmâ meer wienkels in restaurants kwaeme. De lief’ebbers van ‘n stil durpje zû dat gin goeie ontwikkelieng gevonden è, mâ ‘t eit’r netuurlijk wè vô gezurgd dat de aarmoei van vroeher in de West’oek nie mî te vinden is. Dialect trouwes ok nie, want iedrendeên die mit de badhasten te maeken kreeg dee z’n besten om zô goed mohelijk Nederlands te praeten. Ze bin ier nie zô groôs op ‘t Zeêuws as de Friezen op ulder taele. Ik è in de zeventiher jaeren nog ‘s in de klasse evrohe wie of t’r wist wat ‘n vazze was. Want zô’n “graspol”, die goôide de joengers vroeher nae mekaore. Noe, gin eêne kon zaahe wat of ‘t was. Naarhest op Schouwen-Duveland is ‘t dialect zô vlug verdwene as op Renisse in Aemstie.
Tot vô kort was ‘t in de winter wî ‘n stil durp bie ons, mâ zaalfs dat kû m’n â nie mî zaahe. ‘t Is noe eihenlijk ‘t eêle jaer gezellig druk in ‘s zomers bienae onhezellig druk. Mit de voôrdeêlen kwaeme ok de naedeêlen. Want bie aole badhasten zaete vee joenge maansen in die liete d’r eihe snachs goed ‘oôre. Wulder wone midden op ‘t durp in ons wiste dat om drie ure snachs, as de bars gienge slute, de jeugd mit vee leven trug liep nae de campiengs. Dae wiere m’n trek wakker van, mâ om ‘n uur of viere was de meêste drukte wè over. M’n è zaalfs mee’emaekt dat ‘t “in” was om op ‘t gos van ‘t durpsplein te slaepen. Ze wiere dan eêl vroeg van de kouwe wakker in dan wiere de autoradio’s an’ezet. Je behriept, op zô’n tied ei je gin zin in arde meziek! <NO1>In toe ‘n krootje op ‘t gos tehenover ons uus ‘n tente dee opzette è m’n toch mâ de plisie ebaald. Ze waere nie makkelijk weg te kriehen, ze waere onstrant genocht.
<NO>
De leste jaeren gaet ‘t vee beter in dat kom toch ok omdat ze pas mahhe drienke as ze achttiene bin. D’r wier wè om gelache, want die nieuwe wet zou agheêl nie aalpe, mâ ‘t ei toch genocht ge’olpe om ‘t ier rustiher te kriehen. Ze gae noe drienke in België of Spanje. Lae mâ doe!

poll

Ook in Zeeland kun je carrière maken

Ook in Zeeland kun je carrière maken

  • Eens (50%)
  • Oneens (50%)
4 stemmen