article
1.6696733
't Was eigenlijk mêêr dan tied, dan 'k in 't begin van de weke de dahlia's uut de grond 'aolende. Mêêr dan tied. “ Die moe je d'r uut 'aolen in 't begin van oktober,” zei 'n mannetje bie ons uut de buurte, “as d'èrpels uutgedaon worren.” En die kon 't weten, want dit jaor stoengen z'n dahlia's het schôônste van 'êêl 't durp.
Dahliao's van 't internet (audio)
't Was eigenlijk mêêr dan tied, dan 'k in 't begin van de weke de dahlia's uut de grond 'aolende. Mêêr dan tied. “ Die moe je d'r uut 'aolen in 't begin van oktober,” zei 'n mannetje bie ons uut de buurte, “as d'èrpels uutgedaon worren.” En die kon 't weten, want dit jaor stoengen z'n dahlia's het schôônste van 'êêl 't durp.
http://www.pzc.nl/extra/streektaal/rinus-willemsen/dahliao-s-van-t-internet-audio-1.6696733
2016-12-01T08:33:26+0000
http://www.pzc.nl/polopoly_fs/1.4431485.1404287575!image/image-4431485.jpg
Terneuzen,Dialect,Taal
Rinus Willemsen
Home / Extra / Streektaal / Rinus Willemsen / Dahliao's van 't internet (audio)

Dahliao's van 't internet (audio)

Foto's
1
Reacties
Reageer
    't Was eigenlijk mêêr dan tied, dan 'k in 't begin van de weke de dahlia's uut de grond 'aolende. Mêêr dan tied. “ Die moe je d'r uut 'aolen in 't begin van oktober,” zei 'n mannetje bie ons uut de buurte, “as d'èrpels uutgedaon worren.” En die kon 't weten, want dit jaor stoengen z'n dahlia's het schôônste van 'êêl 't durp.

    Bienao twêê meter 'ôôge en kleuren dan d'r op stoengen. Nie te beschrieven. Jao, dan stoengen die van mien d'r mao maogertjes bie. Mao, da moe gezeid worren, m'n kleuren waoren schitterend. Prachtig schôôn doenker rôôd, geel en ook nog een struuk mee rôôje blommen mee 'n wit puntje d'ran. 't Was voo die dahlia, dan 'k m'n spao pakkende om de struken uut te doen. Op dien struuk bin 'k 'êêl 'ôôgvèèrdig. Die zou 'k nie gèrn laoten bevriezen.

    “Je kan d'r ook een paor schoppen mis op gôôien,” zegt de buurman, die langst komt riejen. “Onder mis, dao vriest het ook nôôit nie.” Ik knikken, binst a tie nao m'n dahlia's kiekt die in een stevige, brune dôôze wa liggen te drôôgen. De buurman vertelt dat ie eigenlijk 'n grôôten 'eekel eit an dat 'uutdoen van die blommen. “Onder de mis bleven ze ook altied goed en dan bin je van al dat gepruts af,” geef tie me nog mee as 'n wieze raod. Ik knikken nog maor 's en dienken bie m'n eigen: “Da zou ik daorom volgend jaar ok wel 's kunnen doen. 't Is altied de moeite wèèrd om te promberen.” Onwillekeurig moen 'k terugdienken aan toen me vroeger thuus tegen de gevel d'èrpels bewaorende. Tegen de gevel van d'n 'uuze. Jao, buuten, in 'n 'oekje. 'n Paor dikke kartons d'r op. 'n Paor latten daorover, zodat 't karton nie kon wegwaoien en 't was gepiept ee. In dat 'oekje dao vroos het nooit. Allì, da dochten me, totdat... Juust, je snapt het wel ee? Mao toen was 't ook te laote. Bevrozen èrpels die kan je nie mêêr eten. “Laot die mao zitten,” zei m'n moeder, “die sput je van 't voorjaor maor onder.” Toen 't gieng dôôien zakkende 'êêl dien 'ôôp in en begon te vrotten. Wat 'n mottig wèrkje was da mao joengen om dat zootje op te ruumen. Net pap en stienken. En al zakkende alles in mekaore, toch was 't nog 'n flienk bitje. Jao, waor a je nog an dienkt, za je zeggen, an èrpels bewaoren.

    Dao waoren vroeger ook nog mènsen die maokende 'n èrpelgraf in den 'of. Mènsen mee grôôt 'uusouwens ee. Jao, echte èrpeleters waoren dà. De vrouwe schellende 's morgens dan 'n glimmeneerd immertje vol mee petatten. Kan je begruupen. Die goengen 's middags allemaol op ee. Dao bleef niks over in de panne. O jao en dan zat 'r ook nog 'n vèrkentje in 't kot. Dao wieren ook èrpels voo gekookt. En op dat èrpelgraf lag êêst riet, dat mee grond wier afgedekt. En rond dat èrpelgraf lag een gripje om 't waoter op te vangen. Om de paor daogen wier t'r 'n stêênmande èrpels uut dat graf ge'aolen. Sommigste mènsen zettende 'n pottebuze d'r boven op dien 'ôôp. Da liekende da wel 'n schouwe. Dat was om te luchten.

    En noe? Noe gao je nao de supermarkt om èrpels en daor 'aol je soms ook je dahlia's. Of je laot ze thuuskommen via internet. Nog makkelijker. Toch?