article
1.6579287
In deze rubriek belichten we wekelijks een Zeeuws dialect. Deze keer een verhaal van Henk Blom in het Schouwse dialect.
Wanneer ben je een echte Zeeuw? (In plat Zeeuws)
In deze rubriek belichten we wekelijks een Zeeuws dialect. Deze keer een verhaal van Henk Blom in het Schouwse dialect.
http://www.pzc.nl/extra/streektaal/henk-blom/wanneer-ben-je-een-echte-zeeuw-in-plat-zeeuws-1.6579287
2016-10-27T09:57:00+0000
http://www.pzc.nl/polopoly_fs/1.4551753.1477391501!image/image-4551753.jpg
Schouwen-Duiveland,Dialect,Taal,Streektaal,Henk Blom,hermes
Henk Blom
Home / Extra / Streektaal / Henk Blom / Wanneer ben je een echte Zeeuw? (In plat Zeeuws)

Wanneer ben je een echte Zeeuw? (In plat Zeeuws)

Foto's
1
Reacties
Reageer
    In deze rubriek belichten we wekelijks een Zeeuws dialect. Deze keer een verhaal van Henk Blom in het Schouwse dialect. 

    In de PZC wier 'n stuitje elee de Zeêuw besproke. Wanneer bin je eihenlijk 'n Zeêuw? D'r wier zaalfs 'n onderzoekje edae in bienae viere van de vuve waere van meênieng dat je Zeêuw bin as je in Zeêland gebore bin. Z'aode dienk ik nie vee nieuws te vertaalen, want d'r wier 'n eêl blad an dit 'item' opg'offerd. Wat 'n onheloaflijk dom ver'ael. Ik most 'r an dienke dat ik 's op Omroep-Zeêlandtillevisie 'n vint ezie ao, die in Zeêland was gebore, mâ ok trek uut de previnsie was verdwene omdat z'n ouwers ver'uusd waere naer de Randstad.

    Noe kwam 'n trug, ie wist glad niks van wat 'r ier aomè gebeurde, mâ ie was 'n bitje bekend g'ore in noe wier 'n ier binneg'aeld as 'n echte Zeêuw. Want jao, zô'n kans laete m'n ons nie ontneme, 'n bekende Nederlander die ok glieke Zeêuw is, dat zâ wè weinig voôrkomme. Dan bin ons zô groôs as 'n schaep mit eên ore. 't Liekent wè as of Zeêuwen toch 'n bitje 'n minderwaerdig'eidshevoel è. As wulder in de trein zitte van Goes nae Roosendaal komme m'n netuurlijk lengst Kapaale in dan zie m'n die leutihe tunnel mit stikjes uut de kinderboeken van Annie M.G. Schmidt in de moôie tekeniengen (Jip en Janneke) van Fiep Westendorp.

    't Was 'n goed idee om dat zô te doen in jao, onze Annie was dan toch mâ 'n Zeêuwse, é! Twint dat ons aomè wete, dat onze Annie d'r eihe nooit tuus evoeld eit in Zeêland. In daer draoit 't noe net om, vind ik. Ik neme m'n eihe mâ. Ik bin gin Zeêuw, mâ ik wone noe â meer as 61 jaer op Renisse. Ik betrappe m'n eihe d'r op, dat ik somtieds in Schouws dialect dienke. Zôvee tied as ik waarke an mien Schouwse columns in de PZC in ok in Ons Eiland Schouwen-Duveland, zôvee versjes as ik eschreven è in dialect vô de Schouwse Cabarethroep Kant'ooi...

    Mâ ik bin gin Zeêuw. Ik luste gin mossels in krukels, dae bin ik nie mee op'ekweekt. In van mien zouwe ze van 't Zeêuwse volkslied enkelt 't eêste couplet oeve te ziengen. 't Belangriekste is dat ik m'n eihe van 't eêste behin of ier tuus evoeld è. Dat is 't aolderbelangriekste: j'n eihe tuusvoele op 'n plekke. Dat 't ier ok nog eêl moôi is, is dan nog glieke meehenome. Je mot j'n eihe wè gee, netuurlijk. Want ik 'oôre wè 's dat de Zeêuwen stug bin, mâ dat vaol best mee. 't Is waer, ze vliehe je nie trek om j'n aols, 't bin toch maansen die de katte uut de boam kieke.

    Die gauw dienke: je mot j'n eiers nie taale vô dat je ze in je mandje eit. Mâ 't lei ok an j'n eihe. Jao, want wat is noe eihenlijk 'n Zeêuw? D'r is naemelijk in z'n alhemeên'eid best verschil tussen bevobbeld de Schouwenaers in de Zeêuws-Vlaemiengen. Die leste gee d'r eihe wat maklijker as de Schouwenaers. Lae m'n noe 's ofspreke, dat julder nie mî vraehe: bin jie 'n Zeêuw? mâ: Voel je j'n eihe ier tuus? Dat leste klienkt in aalk geval â aordiher.