article
1.6174949
Endrik mag graeg op de tillevisie nae sport kieke. Dat is nie aoltied leutig ô, bevobbeld â je nae ’t voetballen gae kieke waer of Nederland nie an mee mag doe.
Sport (audio)
Endrik mag graeg op de tillevisie nae sport kieke. Dat is nie aoltied leutig ô, bevobbeld â je nae ’t voetballen gae kieke waer of Nederland nie an mee mag doe.
http://www.pzc.nl/extra/streektaal/henk-blom/sport-audio-1.6174949
2016-07-08T08:00:00+0000
http://www.pzc.nl/polopoly_fs/1.4551753.1477391501!image/image-4551753.jpg
Cultuur,Taal,Henk Blom,Dialect,Streektaal
Henk Blom
Home / Extra / Streektaal / Henk Blom / Sport (audio)

Sport (audio)

Foto's
1
Reacties
Reageer
    Endrik mag graeg op de tillevisie nae sport kieke. Dat is nie aoltied leutig ô, bevobbeld â je nae ’t voetballen gae kieke waer of Nederland nie an mee mag doe.

    Dat è ze d’r naer emaekt. ’t Was toch de leste jaeren angst’aezenvoetbal g’ore. Ze waere te benauwd om nae vore te gaen. ’t Was tikkie trug, tikkie opzie in wî tikkie trug. Ze stienge somtieds menuten lank mit ulder rik naer ’t doel van de tehenstander, wouwe enkelt de bal zô lank as mohelijk is in ulder bezit ouwe, mâ anvalle dat kende ze nie mî. Wat was dat andester in 1988, toe dat Nederland Europees kampioen wier mit goals van Gullit in Van Basten. Gewonne van Rusland! Ik wete nog goed dat de fanfare van Renisse nae de Neeltje Jans most om daer bie ’n groôte tentoônstellieng meziek te maeken. Dat was net op de finaledag in d’r wier vee bezwaer emaekt vanuut de “meziek”. Pas toe de voorzitter zei dat ons daer op de Neeltje Jans de wedstrijd konde bekieke gienge ze aomè mee. Wat è m’n genote in “aanvalluuuu” erope.

    Jao, me bin zaalfs wè ’s zô zot eweest om mit ’n stelletje vrienden, gekleêd in oranje, vô de tillevisie te gae zitten. M’n aode vee leut, want zô waark dat. In ’n stadion is dat nog vee aarher. As puber gieng ik mit pao in mien ouwere broer ok nae ’t stadion. Dan zaete d’r achter ons op de tribune eêl nette vinters, tot dat de wedstrijd behon. Wat ‘r dan uut ulder monden kwam zâ’k mâ nie schrieve, want dan ‘oor ik trek bie de PZC ontslohe. Mâ ’t is waer, mit ’n groôte kro maansen kâ je toch meer geniete. Tuus zit ik aoltied alleênig naer de voetbal te kieken, de vrouwe zit dan te lezen in kiek enkelt as t’r ’n doelpunt vaolt. Is dat bie julder ok zô?

    Ik doe nie an voetbal, ik doe an tennis. Zaalf noem ik ’t liever “’n balletje slae”, want ik wete nie of je dat spel van mien tennis mag noeme. Lank elee, nog in de tied van de oute rackets, dee ik gin bal goed slae in ’n belangrieke wedstrijd. Toe dat ons verloren aode in de baene ofliepe zaehe m’n pas dat mien racket eêmae krom stieng. Jao, dan kâ je ok nie winne, é. Noe is dat nie ’t belangriekste, zaahe ze aoltied, meedoe is belangrieker. In jao, de oafdpries è’k â eêl lank elee ewonne, want ik è de vrouwe op de tennisbaene lere kenne. ’t Is ’n treurihe zaek, daer kan ik ok nie aoltied van winne! Dan dienk ik nie dat meedoen belangrieker is, dan dienk ik somtieds: lae mâ doe.

    Me deeje tuus in mien jeugd vee an sjoelen. Eêl fanatiek. Pao most potloôdstreepjes zette bie ‘t gat van de vakken, de steên most daer eêmae over’ene weze, anders taalde ’t nie. Zô was t’r ok minder ruzie. Wat dat anbelangt is ’t goed dat ‘r tehenwoordig bie vee groôte tenniswedstrijden “hawk- eye” is, zô dat iedrendeên kan zie dat de bal in of uut was. Gelokkig è m’n die bie ons nie noôdig.

    Wulder dienke meêstentieds ok: lae mâ doe.