article
1.5971361
“Di komt toch zeker wi wè een stikje over je vakantie in de krante éé?”, vroeg iemand. Jae, dat komt er, mè het is meer een waerschuwing vô iedere argelôze vakantieboeker! Mee dank an “booking.com”, wi je overal in de wereld een vakantieplekke kan boeke.
Een uutoek van ellende (audio)
“Di komt toch zeker wi wè een stikje over je vakantie in de krante éé?”, vroeg iemand. Jae, dat komt er, mè het is meer een waerschuwing vô iedere argelôze vakantieboeker! Mee dank an “booking.com”, wi je overal in de wereld een vakantieplekke kan boeke.
http://www.pzc.nl/extra/streektaal/frans-van-der-heijde/een-uutoek-van-ellende-audio-1.5971361
2016-04-30T10:00:00+0000
http://www.pzc.nl/polopoly_fs/1.5971649.1461927590!image/image-5971649.JPG
Middelburg,Dialect,Taal,Streektaal,Frans van der Heijde,hermes
Frans van der Heijde
Home / Extra / Streektaal / Frans van der Heijde / Een uutoek van ellende (audio)

Een uutoek van ellende (audio)

Foto's
2
Reacties
Reageer
    • Afbeelding
      Beschrijving
      Nae een slâlom van een paer onderd meter over zô’n karrespoor...
      Fotograaf
    • Afbeelding
    “Di komt toch zeker wi wè een stikje over je vakantie in de krante éé?”, vroeg iemand. Jae, dat komt er, mè het is meer een waerschuwing vô iedere argelôze vakantieboeker! Mee dank an “booking.com”, wi je overal in de wereld een vakantieplekke kan boeke. 

    Me aode di, maenden van tevoren twi “niks dan lof kaemers” gereserveerd, de leste tweê…! El Fogon del Duende in Arcos de la Frontera. Dat kloenk zeer Spaâns en kreeg as wardering een 9,2! Vanuut Portugal trokke me, in onze uurauto, nè dat idyllische oord. Me vonde het zeer attent dâ ze ons, een paer weken vô vertrek, uutgebreid de routebeschrieving toestierde en voelde zelfs nog hin nattigheid toen de straetnaeme nie op onze tom-tom verscheen. Arcos was hin wereldstad en me aode onze mond bie ons.

    Me konde nog lache toen de tom-tom midden op een rotonde anhaf: “Bestemming bereikt”. Toen begon d’r een vruchtelôze zoektocht nè El Fogon del Duende, vrie vertaâld: “Uutoek van ellende” Iedereên an wie me de weg vroege, wist wi me moeste weze en mee drukke gebaeren aode ze het over “de eeste weg links” en “nae vieronderd meter rechts anouwe”. Oe me ook ons best deeë, me kwaeme “nerregens” terecht. Pas toen me hinge beseffe, dâ ook onverarde paeden, vol kulen en bulten, naemloôs en steil omoog lopend, “wegen” waere, kwaeme me dichter bie ons doel.

    Karrespoor

    Alhoewel…het moest een onverarde zieweg weze van een onverarde weg, wibie de vergelieking mee een “karrespoor” nog het beste was. En van dat soort “wegen” waere d’r nôha wat! En stilvalle mee j’n auto op zô’n helling mee nèt een bulte, die de onderkant van d’n auto rocht en rubber dee ruke bie ’t wi op gang komme, brocht ons toch echt “van pad af”.

    Ten einde raed ebbe me angebeld bie iemand, die ons, in d’r eihen auto, nè “Del ellende” brocht. “Di toch nie éé..?” brochte de vrouwen d’r paniekerig uut, toen me vô ’t ekken stoenge wi twi hrôte onden ons begroette, nae een slâlom van een paer onderd meter over zô’n karrespoor! Het was het wè..! Vluchte kon nie mi, de onden moeste weg en de poorte hieng open. Me waere op ons “bed en braekfast” angekomme….!

    Dierentuun

    De kaemers bleke wat “gedâteerd”. Het meubilair was dienkelijks op een rommelmart haele. Een tillevisie ontbrak en de föhn zochte me tevergeefs. De afmetingen van het bed waere eêl geschikt vô mensen, die pas getrouwd waere of “stiekeme stelletjes”…! De douche ao vuuf minuten nôdig om waerm te lopen en aole deuren waere te laoge om rechtop deu te haen. Rond het uus was ’t een complete dierentuun. Achter liepe paerden, vô het uus een êle kudde geiten en êel vee onden in de buurt zurgde vô een levendige conversâtie, helaâs dag en nacht…! Di waere ook een paer aenen, die totaâl hin weet aode van de tied en dag en nacht kraoide! De veugels zoenge ook â vroeg en af en toe rammelde het zunnescherm mee in het dierenorkest..!

    Wifi

    Mè oe kon dit uus een 9,2 kriehe? Nou, je weunde landelijk…! Het uutzicht was prachtig, het ontbijt goed, de twi hrôte onden lief, de sinasappelsap vers van de net geplukte vruchten en het vrouwtje, die veruurde, was vriendelijk en behulpzaem. Di moest ook wifi weze, mè di ebbe me nie zô vee van gemerkt. Di lei vô ons Zeêuws Deltabedrief nog een prachtige taâk…! Di waere ook wè drie plekken om te zunnen, mee redelijke stoelen, alleên scheen de zunne zô weinig. Mè di kon niemand wat an doe!

    An de 9,2 bin ze vô ons gevoel nie gekomme. Laet het vô iedereên een waerschuwing weze: “ Vee belove en weinig geve…..!”