article
1.6403080
Mie het verschienen van 'Nijntje op de fiets' kom ok de vraege wee vrom of a het Zeêuws za verdwiene, wan guus die a dialect praote bin d'r nie mî vee. Het antwoord is deur aollerlei mensen a dikkels egeve en het wiekt nie vee uut mekaore. Op d'n duur verdwient het Zeêuws zôas oans het noe praote. Het verdwient net as het Amsterdams in Mokum, het Nederlands in Haarlem en het Fries in Ljouwert (Leeuwarden). Taal verandert. Probeer mae es Nederlands te lezen uut d'n tied van de Zeven Provinciën of lees es een stikje uut de Statenbiebel. Taal verandert mie de mensen en ulder cultuur mee. A de kids an 't gamen bin doe ze een spelletje op d'r IPad en dat is wat anders as tegaere knikkere of pottelille. Zôlank a oans Zeêuws bluve praote zôa me 't gewend bin, bluuft het dialect bestae. Mae ok in oans eigen leven binne me a veranderd in woordgebruuk en klank. De vorige keêr è 'k daè ok a over eschreve.
Een kernien op een fiets (audio)
Mie het verschienen van 'Nijntje op de fiets' kom ok de vraege wee vrom of a het Zeêuws za verdwiene, wan guus die a dialect praote bin d'r nie mî vee. Het antwoord is deur aollerlei mensen a dikkels egeve en het wiekt nie vee uut mekaore. Op d'n duur verdwient het Zeêuws zôas oans het noe praote. Het verdwient net as het Amsterdams in Mokum, het Nederlands in Haarlem en het Fries in Ljouwert (Leeuwarden). Taal verandert. Probeer mae es Nederlands te lezen uut d'n tied van de Zeven Provinciën of lees es een stikje uut de Statenbiebel. Taal verandert mie de mensen en ulder cultuur mee. A de kids an 't gamen bin doe ze een spelletje op d'r IPad en dat is wat anders as tegaere knikkere of pottelille. Zôlank a oans Zeêuws bluve praote zôa me 't gewend bin, bluuft het dialect bestae. Mae ok in oans eigen leven binne me a veranderd in woordgebruuk en klank. De vorige keêr è 'k daè ok a over eschreve.
http://www.pzc.nl/extra/streektaal/engel-reinhoudt/een-kernien-op-een-fiets-audio-1.6403080
2016-09-16T13:37:00+0000
http://www.pzc.nl/polopoly_fs/1.4411295.1473955743!image/image-4411295.jpg
Dialect,Taal,Engel Reinhoudt,Streektaal,hermes,'s-Heerenhoek
Engel Reinhoudt
Home / Extra / Streektaal / Engel Reinhoudt / Een kernien op een fiets (audio)

Een kernien op een fiets (audio)

Foto's
1
Reacties
Reageer
    Mie het verschienen van 'Nijntje op de fiets' kom ok de vraege wee vrom of a het Zeêuws za verdwiene, wan guus die a dialect praote bin d'r nie mî vee. Het antwoord is deur aollerlei mensen a dikkels egeve en het wiekt nie vee uut mekaore. Op d'n duur verdwient het Zeêuws zôas oans het noe praote. Het verdwient net as het Amsterdams in Mokum, het Nederlands in Haarlem en het Fries in Ljouwert (Leeuwarden). Taal verandert. Probeer mae es Nederlands te lezen uut d'n tied van de Zeven Provinciën of lees es een stikje uut de Statenbiebel. Taal verandert mie de mensen en ulder cultuur mee. A de kids an 't gamen bin doe ze een spelletje op d'r IPad en dat is wat anders as tegaere knikkere of pottelille. Zôlank a oans Zeêuws bluve praote zôa me 't gewend bin, bluuft het dialect bestae. Mae ok in oans eigen leven binne me a veranderd in woordgebruuk en klank. De vorige keêr è 'k daè ok a over eschreve.

    Nijntje is wè een leuk voorbeeld van veranderienge. Ik bin op'egroeie op een klein oefje en me wiere geacht ok wat te doen voe de kost. Daè was aoltied wè werk en je wier zelf, zô jonk kô j' nie weze, ok verplicht om wat te doen. Je kreeg een reêpje 'of om wat groente te zaaien of petaoten te zetten en ik ieuw kernienen. Dat leste was een behoorlijke winstgevende bezigheid. In 't voorjaer dee je een paer jonge kernienen op en dan most je die trouw elken dag eten geve, daèvoe snee je gos langs de dulfkant of op d' n bleik. M'n zekel ang aoltied nog roestig te wezen nest d' achterdeure: een trofee uut d'n goeien, ouwen tied. Eêns in de weke most je de kernienekoten uutmisse en schoan strô d'r in doe.. De kunst was om de beêsten tegen de kerst (de kossemisse) op een kilo of zes zevene te kriegen. Mie drôge ôgen en 'goud in zicht' keek je d'r op toe a je vaoder ze een klap achter d'r oaren gaf en ulder jas uutdee. Die jas brochte me naè Jan Westveer die a d'r twî kwartjes voe gaf. Het geslachte kernien gieng naè fermielje of kennissen die a d'r een tientje voe gavve. Dat goeng in je spaerpot. Dat schoot beter op dan over'ouwe van een dubbeltje zakgeld. Toen ao ze Nijntje groate flauwekul evonde. Een kernien dat a fietst, dat bestaè toch nie. Oans ao nog gedege literatuur liek as 'De boze koster' van W.G. van der Hulst of 'Het klompje dat op het water dreef'. Dat was stichtelijk en spannend, mae een kernien dat a mie d'r voader naè zeê gaèt in een auto of dat a t'r fiets oppoest a ze een eindje wig'ewist eit, dat is de nochterigheid ten top. Dat zou te braaf ewist è en zeker nie passend in mien jonge jaeren, die van'40 en '50. Mae noe is het ok wee a achter'aeld. Guus kunne a fietse a ze amper kunne lôpe en je fiets oppoese a je een eindje efietst eit daè è ze ok nog noait van ehoare. En opa en oma Pluus die zitte echt nie mî te wachten toet a Nijntje om een koekje komt. Die zitte in Spanje of ze bin naè de fitness. En a Nijntje in een auto zit, dan is het nie aoltied vaoder die a riedt. Dan is het mams of eur nieuwe vriend. Het bin dan noe ok eêrder de ouwelui die a de boekjes leuk vinde dan de guus.

    En de guus? Ik ao Thijs van tiene 'De scheepsjongens van Bontekoe'mee' egeven om te lezen op vekantie, mie alverwege en op 't ènde een tientje voe een traktatie. 'k Vond het zelf een goed idee. "En?", vroeg ik toen a t'n vrom kwam. "Ik ao de film a ezie opa en ik leze het ok liever op m'n E-reader", zeit 'n. Padde en de rest van de bemanning kan bie 't oudpapier. "En dat geld?" Daè aod 'n een laserpenne voe ekocht. Toen a 'k zelf een weekje naè d'n Achter'oek goeng kampere, kreeg ik van um ok een boek mee: Ipad voe dummies.

    Dàt las ik op internet: a t'r er een wind van verandering waait, bouwe sommige mensen schermen en andere windmeulens.